• 永恆

「夢」中的婚禮

「黃夢夢小姐,你是否願意嫁比陳月先生,做你嘅合法丈夫?」神父望住我講。


「我願意!」我點點頭,然後好深情咁望住即將做我老公嘅陳月,佢果對深情嘅靈魂之窗,由我第一次見到佢開始,我個心就被佢融化咗。


「陳月先生,你又是否願意娶黃夢夢小姐,做你嘅合法妻子?」神父繼續問。


「我願意!」佢嗰把低沉嘅聲線,真係可以用完美嚟形容,點解上天要製造一個咁完全仲美嘅人,然後仲要比我遇到佢,佢仲要做埋我老公!


「好,咁我現在宣布你哋已經成為合法夫妻……」我已經等唔切神父講嗰堆又長又譖嘅說話,我即刻一嘢就嘴落去我老公度。


「你嘅願望已經達成……咁我要攞走你一樣嘢啦……」我老公無啦啦同我講咗句咁嘅嘢,我初時都無乜理佢,當時嗰環境咁正,我真喺踩佢都傻啦,但後來我發現原來要有幸福嘅生活,喺要付出代價㗎……


一年一年咁過去,我同我老公喺結婚前就講咗話唔會生小朋友,因為我哋覺得我哋負擔唔起呢個責任,咁不如唔好生,好好享受下二人世界算。但喺我最近發現左一樣好奇怪啲嘢,我發現我老公嗰樣好似唔識老咁,我睇翻啲結婚相,佢嗰樣同十年前幾乎一模一樣,而我嗰樣就老左好多。


「老公?」


「做咩?」


「點解你好似唔識老咁嘅?奶奶平時比咩你食㗎?」


「咪又係啲普通野。」


「你自己睇下啲相,你嗰樣喺一啲分別都無㗎喎!」我好激動咁指住幅相,我咁緊張唔係因為我妒忌,我只喺擔心佢身體會唔會出咗咩事。「你唔好咁緊張啦,我都無事。你喺咪近排工作壓力太大呀?」我老公㩒住我個頭,烏低身用佢嗰對深情嘅眼望住我,我忍唔住笑咗出嚟,然後大大力咁攬住佢。


但喺,原來成件事比我所想像嘅更加複雜。自從我同完我老公講話佢嗰樣好後生,我嗰身體嘅情況就變得越嚟越差。之前明明成年先睇得幾次醫生,依家我幾乎每個月都要睇一次醫生,連醫生都搵唔到我有咩病。


「老公…我喺咪要死啦……」有一次我訓覺嗰時真喺忍唔住喊咗出嚟,因為我嗰身體已經虛弱到我連行一陣路都已經好攰,就好似個九十幾歲嘅阿婆咁。


「無事嘅,你點會有事呢?」


「老公…你把聲咁嘅?你無事呀嘛?」我老公把聲突然變到沙曬,而且有點令人毛骨悚然。


「老公,你唔好玩啦,你喺咪慶祝緊萬聖節呀?我無心情同你玩呀!」我用盡我全身嘅力氣坐起身,然後扯住我老公件衫。


但喺…我發現我扯起嘅喺一副骸骨……


「呀!!」


「你叫乜嘢呀?呢個喺嘅願望嚟喎?」一個著住全黑色衫嘅男仔企咗喺我面前。


「願望?咩願望呀?!」我即刻攞起我放喺床邊嘅書,然後扔過去。但點知本書竟然穿過咗佢個身,直接就跌咗落地。我本來想大叫求救,但我發現我自己根本就發唔到聲,就好似我把聲被人攞走咗咁。


「你唔記得咗啦?你十八歲果時向我許嘅願望?」我「老公」無啦啦同我講咩願望,我先醒起好似真喺有件咁嘅事。我依稀記得我十八歲嗰時見到我身邊嘅朋友都拍緊拖,所以我嗰時生日就許願話我想要個符合我所有要求嘅男朋友,要我付出咩代價都得。但我當時只喺求其講下,我無諗過真喺要成真……


「比你講翻嘢答我啦!」我「老公」揮一揮手,我把聲又翻嚟啦。


「我嗰時求其講下啫,我無諗過當真!」我喺咁將身邊嘅嘢扔過去,希望可以趕佢走,但我「老公」好似完全唔驚咁,佢慢慢行埋嚟我身邊,我越縮越後,最後成個人縮到去床角。「你驚啲咩呢?我都喺攞翻我應得嘅嘢啫?」佢嗰把聲沙啞嘅聲,人類根本就無可能發到出嚟。


「你仲想要咩?我嫁咗比你,我已經咩都比曬你啦!」我除曬我身上嘅衫,只喺淨翻啲底衫褲,希望可以引誘到佢。「我幾時有話要你嘅身體,我唔稀罕!」佢突然將塊面控埋嚟,然後擘大個口,我覺得我全身嘅力都好似被佢吸走緊,我嘅意識開始越嚟越模糊,就快睇唔清楚我「老公」嗰樣,正當我諗住等待死亡降臨喺我身上嘅時候,突然有另一個男人出現喺我「老公」身後邊。


「陳月,你玩夠未呀?」佢一手捉著我「老公」,然後一下扔咗佢出窗。


「你又喺邊個呀?你又想點呀?怪……」正當我想叫救命嘅時候,佢又「收」走咗我把聲,我只可以靜靜咁睇住兩個男人喺度破壞我屋企。佢兩個喺我面前飛來飛去,我就好似睇緊科幻電影咁。


「你都幾多事架喎!」我「老公」無啦啦身後邊多咗幾個藍色嘅火焰,我心諗嗰啲喺咪就喺傳說中嘅「鬼火」,我真咪就嚟要死,所以上天先安排呢場「表演」比我睇。我「老公」不停將啲火扔嚟扔去,搞到我成間房都著曬火,但奇怪嘅喺啲火竟然無燒著我屋企嘢。


「由死靈製成的神器,吾現需要汝的力量,速速前來吾的面前,助吾一臂之力—死靈槍.現!」黑衣人攞住嘅武器全身都喺漆黑色,仲有無數個死靈不停喺佢嘅軀干盤旋。

「搞到親愛嘅死神…唔喺前死神大人出動佢嘅私伙嘢,我邊好意思呀?!」我「老公」再整多咗幾多「鬼火」出嚟。

「喺教訓你之前,等我做咗我應該做嘅嘢先。」黑衣人嚟到我嘅面前,佢只喺講咗句:「唔好意思,嚇親你,我哋有機會再見啦!」

聽完呢句之後,我就無咗意識。到我醒翻嘅時候,我已經喺醫院,我幾乎唔記得曬發生過咩事,醫生話我喺條街度暈低咗,我只喺記得有人講咗兩句說話。

「孤月,你唔捨得佢呀?」

「藍月,你會唔會管得太多呀!」


3 次瀏覽0 則留言

© 2023 by Name of Site. Proudly created with Wix.com